UBD perkenal program Minor dalom Basa'

Dr Noor Azam nginju' kata' alu-aluan.

Tetamu' kehormat ni'an pameran.

BANDAR SERI BEGAWAN, 28 Mac - Dalom usaha'ni mendalami' basa' ngan budaya' antarabangsa', kita' endo mala' kebilukan basa' ngan budaya' masarakat Nabai sendiri.

.

Jadi sebagai jalo' inisiatif kan memartabatkan budaya' samo keunikan khazanah basa' masarakat Nabai, Pusat Basa', Universiti Brunei Darussalam (UBD) tiru' nawarkan program Minor in Language atau Minor dalom Basa' gala' penuntut mala' ngala' status Minor dalom basa' Borneo temuwok basa' Tutong, Belait, Dusun, Lun Bawang samo basa' Daya' yo ketabi'ni basa' Warisan Borneo yo penting.

Perkara' itu nunyi Pengarah Pusat Basa', UBD, Dr Noor Azam bin Orang Kaya Maha Bijaya Haji Othman dalom kata' alu-aluanni ge majlis pelancaran Minggu Basa' ngan Budaya' Jipun ge Dewan Canselor Universiti Brunei Darussalam, yo keno sempurna'kan gama' tetamu' kehormat, Menteri' Pendidikan, Yang Berhormat Pehin Orang Kaya Seri Kerna Dato Seri Setia Haji Abu Bakar bin Haji Apong.

Beliau menerangkan pengenalan program Minor basa' ina' merupa'kan sebahagian kod strategi pendidikan menyeluruh UBD yo membenarkan pelajar yo memenuhi' sarat atau modul yo tiru' keno tetapkan kala' status Minor dalom basa' Borneo, basa' Jipun, basa' Arab, basa' Perancis, basa' Korea' ngan Mandarin.

Dr Noor Azam munyi pengajaran basa'-basa' ina' gama' Pusat Basa' dengan arapan kan mempromosikan kemahiran penting ge kalangan pelajar samo graduan gala' ido mala' jadi rakyat global yo aktif yo mala' bebasa' kudo jenis basa' yo lain-lain.

Beliau nemban walaupun program ina' taman keno perkenalkan Januari 2012 tapi usaha' samo penyelidikan awal utuk program ina' keno umu' kod ta'un 2008 dengan memperkenalkan basa' Dusun, Daya' ngan Tutong.

Dalom temubual ngan Media Permata, Dr Noor Azam menjelaskan dengan lanjut atin bahawa pengenalan program Minor dalom basa' na' adolah inisiatif Pusat Basa' kan pejiya' profail UBD samo njadikan UBD pusat pengajian Borneo, selaras dengan Visi 2015 UBD - iyo umu' UBD jadi antara' 50 universiti tejiya' ge Asia'.

"Kita' arus paham basa'-basa' Borneo itu secara' tradisi'ni adolah basa' yo nisu' bebasa' gala', kekah yo tenulis. Jadi yo mu'on jami' adolah mengkaji' cara' nulis ge iyo, struktur basa'ni yo mesti keno terangkan, samo ngumu' bahan-bahan ngajar untuk ketabi' basa'-basa' ina'.

Dr Noor Azam munyi melalui' usaha' ina', ido bearap kan nyediokan sebuah sistem penulisan bagi' basa'-basa' Borneo ina'.

Mengulas mengenai' tenaga' pengajar dalom kursus Basa' Borneo, Dr Noor Azam munyi ido adolah guru-guru yo ado latihan asas dalom pengajara basa', samo ido mesti' od mala' bebasa' dalom basa' najar ido na' dengan fasih gala' ido mala' nenan keaslian basa'- basa' borneo ina'.

Mengenai penerima'an pelajar terhadap basa'-basa' Borneo, Dr Azam Noor munyi sambutan penuntut na' "sungguh menggalakkan". Basa' Tutong ngan Dusun tiru' keno jalankan duwo ta'un tiru', samo ado duwo kumpulan tiru' nenga' belajar dalom basa'-basa' Borneo na' belajar bahasa berkenaan.

Napon kod Media Permata. Jumaat, 30 Mac 2012.

http://www.mediapermata.com.bn/khamis/mar29t9.htm