Sepasang gembor yo berasal kod Indonesia betemu semula' pali' becarai kod laher tapi ulah-ulahni tabu sejani' dalom 25 batu gala' ge Sweden.
Gembor endo serupa' Emilie Falk ngan Lin Backman keno angkat kod lamin ana yatim ge Indonesia gama' duwo pasangan Sweden kan jani' 29 ta'un lepas.
Ulah-ulahni ido beduwo tabu ge Selatan Sweden, kurang sejam jawu' kod maseng-maseng.
Masa Ms Falk mengkaji latarbelakang keluarga'ni Januari ta'un lepas, iyo sempon kenayi gemborni ngisu' Facebook.
Ido tiru' ngumu' periksa' DNA yo nilu keputusan 99.98% ido berkemungkinan bekenayi.
Keduwo-duwo ido keno angkat kod lamin anak yatim ge Semarang, Indonesia - tapi endado maklumat dalom dokumen ido yo munyi nuwi-nuwi pasal ido na' gembor.
Masa' yapa' ngan yama' angkat Ms Backman lakau kod lamin anak yatim na' derebar teksi ido netong: "Macamana ngan yo setulu ina', kenayi anak itu?"
Jadi ido nulu ngadan Indonesia benada' gama' derebar ina' ge ido ge sekapeng keratas.
Ngadan ina' dai nulung yama' ngan yapa' angkat Ms Backman ngunjar keluarga' Falks ge Sweden, keduwo keluarga' na sempon kan nemu cerita' masa anak-anak ina' kakal di'ek benor.
Ms Falk munyi: "Ido mbandeng-mbandeng dokumen na' ketabi' tapi sayi ido endo betemu maklumat na'. Endo atin ado periksa' DNA masa ina' kan manja' kalau derebar na' lurus basa'."
Maklumat yo lain dalom dokumen ina' ngadan yapa' keduwo-duwo anak di'ek ina', walaupun ngadan yama' ido samo. Aherni ido pun endo berapa' peduli' pasal ido na' kemungkinan gembor, samo aherni endo atin behubung.
Keduwo-duwo anak turis na' keno bada' cerita' itu masa ido mikin raya' tapi taman dai duwo ta'un lepas Ms Falk mikin gatol ati' kan manja' keluarga' benorni.
Nini: "Masa ji' kawin duwo ta'un lepas, jayi' tepiker pasal keluarga', samo pasal jayi' keno angkat, samo tiru' tenetong ku ge yama', iyo mbada' cerita' ina' semula', jadi jayi' pun terus ngunjar Lin."
Ms Falk kala' ngadan samo ngunjar melalui sebuah rangkaian untuk anak-anak Indonesia' yo keno angkat gama' keluarga' kod Sweden sebelum ni sempon Ms Backman ge Facebook.
Ms Falk munyi iyo ngusung message ge "kenayini": "Jayi' laher Mac 18, 1983 ge Semarang, samo ngadan yama'ku' Maryati Rajiman" samo iyo terus kala' balasan: "Wow, ina' ngadan yama'ku od na'! Ina' alu jadi ku od!"
Ido tabu 25 batu jawu' gala' kod maseng-maseng ge Selatan Sweden, samo ido keduwo-duwoni guru, kawin samo alu lot seta'un gala', samo menari' lagu "You and Me" Lifehouse masa kawin ido.
Kod-kod ina' ido beduwo terus behubungan, samo ngerancang kan ngunjar yama' benor ido ge Indonesia.
Ado maklumat endo jelas dalom surat ido keno angkat ina', temuwok pasal yapa' ido yo bekerjo sebagai derebar taxi. Iyo dai ido beduwo tepiker mungkin layi yo mbada' ge yama' ngan yapa' Ms Falks pasal ado kenayi anak ido setulu atin na' mungkin yapa' ido sebenorni.
Napon kod Mail Online. Jumaat, 3 Januari 2012.
comments
0 Responses to "Gembor Indonesia Betemu ge Sweden Pali' 30 Ta'un"Post a Comment