Thursday, February 02, 2012

You are here: Home / / / Crustacean "Supergiant" Kelulu' ge Laut Dalom

Crustacean "Supergiant" Kelulu' ge Laut Dalom

Published on Thursday, February 02, 2012 by Tutong Kita Admin ·

---

Supergiant
"Supergiants" keno sempon ge Kermadec Trench endo jawu' New Zealand



Sejenis Crustacean (hidupan laut yo ngan kulit tuwo') kelulu' 7km dalom laut endo jawu' kod New Zealand.

Binatang ina' - yo genelar "Supergiant" - adolah sejenis amphipod, yo biasa'ni kebuwat 2-3cm gala'.

Tapi yo taman sayi' keno sempon itu, yo ge kawasan Kermadec Trench, lebi kod 10 kali ganda' keraya'ni: yo paleng raya' sabi' 34cm.

Alan Jamieson, kod University of Aberdeen Oceanlab, munyi: "Samo kan sempon lipos yo sekaki' buwatni."


"Jayi' pun teberanti' setegol bepiker: "Nuwi da' na'? Amphipod ina' jawu' lebi raya' kod jangka'anku'."

Binatang ganjil ina' kelulu' ngisu' jerot besi raya' yo penasang kamera', yo nina' ge dalom kaca' batu nilam (Sapphire) gala' taan dalom tekanan laut dalom.

Tuju' long kala' genamot, pi'on long kala' genambar ngisu' pilim gama' kumpulan pengkaji' kod University of Aberdeen, Scotland, samo National Institute of Water and Atmospheric Research (Niwa), New Zealand.

Specimen paleng raya' sekali' petuwod ge kapal keraya' 28cm, tapi yo paleng raya' kelulu' dalom pilim kebuwat 34cm.

Amphipods andang kelulu' adu mulun dalom kumpulan ge dalom sinduk samo kawasan sampit dalom laut yo mala' od sabi' 11km dalomni.

Binatang ina' di'ek, tapi aktif benor, samo ulah-ulahni sesuai mulun ge kawasan macamitu yo tekananni seribu kali ganda' kod paras laut ge tengod.



Amphipod
Amphipods kod kawasan lain biasa'ni 2-3cm buwat gala'.


Ngadan "supergiant" mulo-mulo nisu' untuk specimen raya' yo genamot ge kawasan Hawaii dalom ta'un 1980an.

Kod-kod ina' ado od kelulu' ge laut Antartic, yo keraya' 10cm, tapi ina' pun kalah tiru' gama' yo taman senempon itu.



Selain amphipod, pengkaji' sempon haiwan yo macam pesek yo nambat ido "Isopod" samo "Snailfish" yo mulun ge 7,700m dalom laut.


Dr Alan Jamieson nerangkan macamana' kumpulanni nggambar puta' yo mulun ge laut "dalom sekali'".




Napon kod BBC Online. Khamis, 2 Februari 2012.

http://www.bbc.co.uk/news/science-environment-16834913

0 comments

comments

0 Responses to "Crustacean "Supergiant" Kelulu' ge Laut Dalom"

Post a Comment

Subscribe to: Post Comments (Atom)