Bantahan ge Meser Mikin Ganas

Pembantah mbatek tin gas balek li Pulis Rusuhan ge Tahrir Square, Cairo Nov 22, 2011. -- PHOTO: REUTERS

CAIRO (AP) - Endo ketabi' urang mayek alu Selasa' nyaid urang ramai berubau "Damai! Damai!" ge Tahrir Square, rubau yo samo masa bantahan yo ngikai Presiden Hosni Mubarak kod kuasa' 9 bulan lepas.

Sekumpulan layi yo mato ngan endung ido ketabi' ma'ang tekeno gas penti' mato nggileng uku' ido sambil munyi "Endo atin mala' "damai" tu!".

Bantahan terbaru terhadap ketua' tentera' yo ngganti' Mubarak itu lebi ganas kod bantahan bulan Januari samo Februari - perkara' andang tiru' diduga' gama' aktivis pro-demokrasi masa jeneral-jeneral tentera' ngala' kuasa' samo ngumu' perubahan alu ina'.

Pembantah mbaleng batu ngan bom apui. Pihak keselamatan mbatek gas penti' mato, peluru' pulut samo ngelepas timbakan li udara'. Jumlah yo cedera' mikin temuwod sabi 80 betulu sejam tiru' samo jumlah urang nati pun temuwod od. Urang ramai berubau "samseng" samo "kerajaan miyer" kod bangunan-bangunan.


Napon kod Straits Times. Selasa', 22 November 2011.
http://www.straitstimes.com/BreakingNews/World/Story/STIStory_737045.html