Yingluck Shinawatra Menang Pilihanraya' Thailand

Rachel Harvey BBC News, Bangkok

Yingluck Shinawatra


BANGKOK.

Yingluck Shinawatra tantu' tiru' kan jadi Perdana Menteri' turis pertama' Thailand, samo urang kelimo ngimbit jawatan ina' pali'-pali' abangni tuko, Thaksin Shinawatra, nikai kuasa' gama' pemberontak tentera' dalom ta'un 2006.

Statistik 5 Perdana Menteri' dalom masa limo ta'un na' ngumu' Puan Yingluck bepiker od separuh.

Thailand teruk tekeno kekacauan politik dalom masa Tuan Thaksin keno ikai kuasa'.

Penyukung setia'ni samo musuh kuatni berabut kuasa' dalom parlimen samo ge kalangan urang awam.

Ta'un lepas, pembantah Baju' Ma'ang, yo kan ketabi'ni' sekutu' Thaksin, ngala' kuasa' ge Bangkok.

Tentera' nisu' untuk mberanti' pemberontak, yo aherni nyebabkan 90 betulu nati.

Perdana Menteri' yo kan napu', Abhisit Vejjajiva, dalom usaha teraherni dalom kempenni, nginju' amaran - kalau urang ramai mili' Yingluck, ido sebenorni ngundi' untuk Thaksin, yo mala' nyebababkan Thaksin muli' semula' li Thailand, samo keno inju' pengampunan.

Tapi taktik negatif Abhisit ina' tebalek tindah kesanni.

Yingluck Shinawatra kuan cabaran masa itu iyo dai kan ngeyakinkan urang ramai iyo pun sebenorni mala' berkuasa' sendiri, samo iyo ke'kah sekadar proxy untuk cita'-cita' politik Thaksin.

Yingluck bekempen ngisu' ngadan keluarga'ni samo iyo bejanji kan pemulun semula' polisi abangni yo keno rimo rakyat.

Parti Yingluck tiru' munyi ado kemungkinan pengampunan gala' ado damai dalom negeri'. Tapi pengkritik ba'ut itu mungkin cara' ido kan ngisok Thaksin semula' dalom kuasa' kerajaan.

Keduwo-duwo bekenayi menafikan itu, tapi Tuan Thaksin endo ngerahsia'kan iyo andang kan muli' li Thailand "dalom masa yo sesuai".



Napon kod BBC News Online. Isnin, 4 Julai 2011.

http://www.bbc.co.uk/news/world-asia-pacific-14008883