Basa' Tutong Najar ge UBD

Bandar Seri Begawan, Isnin.


Pusat Bahasa, Universiti Brunei Darussalam (UBD), taman napu' nawarkan kursus Basa' Tutong formal pertama' ge peringkat universiti'. Kursus Basa' Tutong (peringkat asas I) na' endo sangka'-sangka' keno terimo gama' penuntut kod bebagai latarbelakang. Mulo-mulo sabi 37 penuntut ndaptarkan diri kan ngala' kursus yo belangsung kebuai 14 minggu' itu, tapi aherni tinggol 30 gala' pali' ado yo narek diri pasal endo betemu jadual kelas. Masa mulo-mulo tenawar, keno jangka'kan dalom 10-15 betulu penuntut gala' ngala', tapi ramai dai tinda.




Penuntut yo ngala' kursus itu macam-macam bangsa' tapi adu od yo yama' atau yapa' ido asal kod Tutong, tapi ido endo manja' bebasa' Tutong ge lamin. Adu od yo nado keno-mengeno ngan Tutong tapi ngala' pasal minat gala'. Kursus ido ge UBD macam-macam temuwok Sains samo Sastera, kod ta'un 1 sabi' ta'un 4.

Penuntut najar perkara'perkara' asas pasal Basa' Tutong secara komunikatif, melalui latihan bebasa', nulis, samo nyaid. Peperiksaan secara' formal nu'on sepanjang semester samo periksa' raya' ge ujung semester itu.

Kursus Basa' Tutong tu keno perkenalkan gama' Pengarah Pusat Bahasa, Dr Yabit Alas, tenulung gama' Ak Hj Hasrol samo Dr Azam Othman kod FASS, UBD. Sambutan yo menggalakkan untuk kursus Basa' Tutong itu jiya' benor pasal iyo bemaksud basa' tradisi' Nabai mala' od najar ge peringkat universiti. Selain Basa' Tutong, Basa' Dusun od ado najar dalom semester lepas itu. Semoga' pali' itu basa'-basa' Nabai yo lain na' yo endo sayi' najar secara' formal, mala' od keno tawarkan gelo.


TUTONGKITA