Burma Ngelepas Aung San Suu Kyi

Suu Kyi mupus ge laman laminni ngisu' baju' tradisional


BURMA, SABTU.


Kerajaan Tentera Burma' taman pelepas ketua pro-demokrasi, Aung San Suu Kyi.

Iyo mupus nyempon penyukungni yo ngeluru' li laminni ge Rangoon pali' pagar nidar.

Penerimo Hadiah Keamanan Nobel na' tiru' keno tenan 15 ta'un dalom masa 21 ta'un lepas itu.

Sebelum ina', peguam Suu Kyi nginju' amaran iyo endo kan nerimo pelepasan ngan sarat, kalau iyo keno larang bepolitik.

Iyo sepatutni nelepas ta'un lepas tiru', tapi keno sambung keno tenan tiru' setulu layi Amerika' kelulu' tengungui Tasek Inya terus muwok li laminni, munyi iyo kan nyelamatkan Suu Kyi.

Alu Minggu' lepas, parti politik keno sukung kerajaan tentera' menang pilihanraya pertama' dalo masa' 20 ta'un. Tapi keputusan ina' keno pertikaikan.

Kod sambut alu itu (Sabtu), urang ramai betipun tetiman-timan berito iyo kan keno lepas, ramai yo ngisu' baju ngan slogan "Jami' midong samo Aung San Suu Kyi".

Suu Kyi mupus temuwod ge pantaran ge dapan laminni ngisu baju tradisionlni. Urang ramai berubau, besurak samo belagu lagu kebangsaan.

"Ado masa untuk kita bediam, samo ado masa untuk bebasa'. Urang ramai mesti kerjo samo-samo. Macamina' gala' kita' mala' ncapai tujuan kita'," bada' ni ge urang ramai.

Tiru' ina' muwok ni dai atin li dalom laminni samo pegawai-pegawai kanan NLD.

Napon kod BBC News, Sabtu, 13 November 2010, 21.01pm
http://www.bbc.co.uk/news/world-asia-pacific-11749661