Had Umur Sekulah, Ibubapa Murung

Polisi tebaru Kementerian Pendidikan mungkin menyebabkan ado penuntut endo mala temuod kelas atau ido tepaksa ngulang setaun kalau mayih had umur yang 'standardised'.

Walaubagaimanapun, perkara ituh kekah undang-undang baru. Sebenor nih, pemberitahuan dan peringatan tiru ninju ge sekulah-sekulah ge seluruh Nabai yang menjelaskan had umur yang mala tenerimo untuk kelas-kelas tertentu, terutama sekali dai kelas Pra samo darjah satu.

Tapi yo njadi kebingungan dan marah ibu-bapa iyolah undang-undaang ituh taman dai kan benor-benor nisu kod aluh ituh. Menurut Akta Pendidikan 2003, Bab XIV, Lampiran 132 (1), "sekulah-sekulah adolah diingotkan untuk menurut had umur yang diseragamkan gama Kementerian Pendidikan, di mana penuntut mesti beumur ndo kurang kod telu taun pada 1 Januari taun pesekulahan bagi peringkat Pra."

Tenemban atin perintah bagi "nursery" atau Tadika I, penuntut mesti umur nih telu taun masa 1 Januari taun nih kan muok sekulah ina; bagi Tadika II, penuntut ndo mala kurang kod empat taun umur; untuk Tadika III ndo mala kurang kod limo taun umur; dan endo mala kurang kod enum taun kalau kan muok Darjah Satu.

Mbo-mbo sekulah yang kelulu ngelanggar perintah ituh akan didakwa lempu Perintah Pendidikan 2003, Seksyen 132, Bhg. XV "Kesalaan dan Hukuman", mukasurat 1040: "Naih-naih kelulu ngumu kesalahan dalom Perintah ituh yang endo ado nginju hukuman dengan jelas mala dendaon endo lebih $5,000 dan penjara selama nedo lebih enum bulan, atau keduo-duo nih sekali."

Kesalahan keduo mala keno denda $500 untuk tiap-tiap sealuh kesalahan ina kakal beterusan.

Tapi bagi urang ramai, temuok dai ibu-bapa penuntut, surat-surat pemberitahuan samo peringatan-peringatan ina endo sayi sabi ge pengetahuan ido, atau ido endo maklum sabi taman aluh ituh. Ado od yang netong kumbo endo keno sebarkan secara meluas. Ado guru samo ibu-bapa mbada ge Bulletin, pihak Kementerian ado nginju peluang sabi 1 March 2010 ituh untuk penguatkuasaan sepenu nih perintah ituh bagi penuntut sekulah rendah. Tapi untuk peringkat Tadika I ke III, Perintah ituh kan kenuatkuasa serta-merta.


Napon kod Waleed Mahdini, Borneo Bulletin Online, Isnin, 4 Januari 2010, 9.46 pm.
http://www.borneobulletin.com.bn/mon/jan4h1.htm