2 Murid Nati Nelanggar Metuka'

Bandar Seri Begawan, 6 Sept - Dua betulu murid turis beumur 6 ngan 7 ta'un nati pali' nelanggar sebuah metuka' penelakau sebetulu guru ge kawasan pakeng metuka' ge Sekolah Rendah Mabohai, Bandar Seri Begawan.

Dayang Nurul Fatin Nabilah Zamain, 6 ta'un yo sepatutni nyambut alu jadini jain ngan Dayang Nabilah Farhana Haji Rahim nabu tekeno cedera' parah ge uku' samo betulu ido pali' nelanggar gama' sebuah metuka' beundur kiro-kiro pukul 10 sambut waktu rehat.

Keduo-duo mangsa' nabu dalom perjalanan li Sepitar RIPAS.

Menurut saksi, keduo-duo mangsa' na' ado ge likud metuka' ina' samo ngan kawan-kawan ido lain masa kejadian ina'.


Setulu saksi munyi: "Mamit-mamit ado guru yo pelakau metuka' ina' ngambat-ngambat mium tulung lakas. Tiru sabi' siyo taman dai jami' sadari nuwi yo terjadi.

"Ni'an kod keadaan mangsa', keduo-duo ido cedera' sangat parah mungkin ge bagian uku' ngan betulu. Setulu ido keno sahkan nabu dami' sabi' ge Sepitar RIPAS," munyini.

Ado guru yo tenetong munyi: "Mungkin guru ina' endo sadar ado penuntut ina' ge likud masa ni ngundur samo museng metuka'ni na'."

Menurut guru kelas mangsa, Cikgu Hamidah Awang Besar, Dayang Nabilah Farhana merupakan setulu pelajar yo sangat rajin samo endo adu daun. Mangsa' iyo od pelajar aktif dalom nuwi gala' bidang bidang pelajaran.

Sementara' ina' pihak Kementerian Pendidikan kesal samo berdukacita' atas kemalangan ina'.

Menteri Pendidikan Yang Berhormat Pehin Orang Kaya Seri Kerna Dato Seri Setia Awang Haji Abu Bakar Haji Apong ngan Pemangku Setiausaha Tetap (Pendidikan teras) samo pegawai-pegawai kanan kementerian li lamin keluarga' murid-murid yo tebabit untuk nyampaikan anyam dukacita samo takziah ido.

Yang Berhormat Pehin yo sedi ulahni munyi:

"Kita' ketabi' besedih samo endo nyangka' kajadian kitu kan terjadi. Sebagai wakil guru terbabit ina' kejadian itu endo sengajo.

"Allah dai gala' yo manja' nuwi yo benor, nuwi yo kita' mala' umu' iyo dai bedu'a agar roh Almarhumah Dayang Nurul keno ina' besamo-samo urang beriman."




Napon kod Media Permata'. Rabu', 7 September 2011.
http://www.brudirect.com/index.php/Malay-News/2-murid-maut-dilanggar-kereta-guru.html