£1.7 juta' Bayaran Balek Untuk Selamatkan Mato

Turis Iran yo buto pali' serangan asid mium barai tebusan

Setulu layi Iran yo keno sabit besala' mbaleng asid ge jawui setulu turis mesti mbarai duwo juta' euro - atau £1.7 juta' - kalau ni kan umu' nyelamatkan matoni.

"Jayi' ngumumkan ji' umu' duwo juta' euro sebagai jaminan idupku', ke'kah sebagai rawatan," Ameneh Bahrami mbada' ge suratabar Arman.

"Kalau macamina' gala' cara'ni ji' kan nyerahkan qesas (balasan keadilan) terhadap Majid, walaupun ido munyi - mudaan gala' benor - ukuman na' kan nu'on minggu' dapan," tembanni atin.

Balasan: Ameneh Bahrami ngan tikas serangan asid pali' Majid Movahedi mbatek Sulphuric acid dalom matoni lepasni nulak pinanganni.. Iyo ngimbit gambar ulahni kulu endoda'ni keno serang.

Majid Movahedi keno ukum keno buto keduwo-duwo tepi' matoni bulan Februari 2009 pali'ni keno sabit sala' mbatek asid ge jawui sekelasni ge universiti Ameneh Bahrami tiru'ni balek-balek endo umu' setuju' kawin ngan iyo.

Ukuman na' keno tangguhkan ge saat-saat aher alu enom lapas, ndo manja' kumbo.


Ameneh Bahrami, yo benor-benor mium ukuman ina', sanggup sabi' kod Sepanyol antarni tabu masa itu arap-arap ukum ina' keno umu'. Iyo atin munyi iyo sendiri sanggup ngelaksana'kan ukuman ina'.

Majid Movahedi tegila'-gila'kan Ameneh sebelum serangan ina'.

Amnesty International mium ukuman na' keno tenan da' kulu masa alu Jumaat, sambil munyi iyo "samo macam siksaan".

"Endo dai kiro macamana' teruk serangan terhadap Ameneh Bahrami, senajo mu'on buto ngisu' asid adolah kejam samo endo beperikemanusiaan samo macam siksaan," nini Hassiba Hadj Sahraoui, Timbalan Pengarah untuk Amnesty International ge Timur Tengah samo Afrika Utara'.


Undang-undang Shari'ah ge Iran mbenarkan ukuman qesas, tapi selalu'ni untuk kes bunu' atau ido yo senajo nyebabkan kecederaan fizikal. AmenehBahrami, 24 ta'un masa serangan ina' dalom ta'un 2001, njalankan rawatan kecederaanni beta'un-ta'un tiru' ge Sepanyol. Iyo buto ge duwo-duwo tepi' matoni, samo kakal ado kecederaan raya' ge jawui samo betuluni.

.

Bukti': Baju' nisu' Ameneh Bahrami samo kasutni yo ancur tekeno asid dalom serangan ina' nina' kakal gama' keluarga'ni ge apartmenni ge Tehran.

Napon kod Mail Online. Rabu', 18 May 2011.

Read more: http://www.dailymail.co.uk/news/article-1388036/Iranian-woman-Ameneh-Bahrami-blinded-acid-attack-names-price.html#ixzz1MihXjilm