Duwo Penutur Pengabisan Endo Umu' Bebasa' Atin...

...Pasal ido endo sejiya'!


Duwo betulu layi, Manuel Segovia ngan Isidro Velazquezto, iyo dai urang pengabisan yo manja' bebasa' Basa' Ayapaneco, sebuah basa' yo endo atin ado urang lain manja' ngisu' ge Mexico.

Tapi ido beduwo na' endo atin sayi' ngisu' basa' ina' - pasal ido andang endo ngam samo endo sejiya' sabi' endo betegur atin.

Padahal ido tabu sejani' gala', kurang setengah batu jawu' dalom kampung Ayapa ge Mexico.

Manuel Segovia setulu kod duwo betulu gala' atin yo tinggol manja' bebasa' Ayapaneco

Urang yo manja'kan ido munyi ido pun endo pandai kumbo laku ido beduwo na' endo betegur, samoado ado masalah raya' antara' ido.

Walaupun Basa' Ayapaneco mulun pali' jajahan Sepanyol kulu ni, basa' ina' kakal od mikin tayi pasal pendidikan wajib dalom Basa' Sepanyol, perpindahan penuturni, samo keadaan kampung yo mikin jadi bandar.

Ado 6,000 basa' ge dunia' itu, tapi dalom separuh keno jangka'kan kan tayi dalom seratus ta'un itu.

Setulu pengkaji' kod Indiana University, Daniel Suslak, munyi keduwo layi na' "endo adu persamaan", samo Mr Segovia, 75, "pemarah", yo setulu na' Mr Velaquez, 69, endo rimo lakau-lakau samo iyo na' "lebi serius" urangni.

Masa keno tetong ge laminni ge Kampung Ayapa ge Selatan Mexico, Mr Segovia mbada': "Masa ji' anak di'ek, ketabi' urang bebasa'. Segetip-segetip tayi basa' ina', masa itu mungkin iyo mayi mati samo jayi'."

Mr Segovia kakal tindah ngisu' basa' ina' ngan awo ngan anakni. Ido ngerati' tapi endo manja' bebasa' ma'ud ge iyo.

Kuluni iyo ngisu' Basa' Ayapaneco ngan kenayi ni layi, tapi iyo nati 10 ta'un lepas, menurut lapuran Guardian.

Dalom pada ina', Mr Velazquez keno pecayai' endo atin ngisu' basa' asli'ni na'.

Ngadan "Ayapaneco" na' ninju' gama' urang balui, tapi keduwo-duwo Mr Segovia samo Mr Velasquez ngambat basa' ido na' "Nuumte Oote", yo bemaksud "Suara' benor".

Daniel Suslak munyi ido beduwo na' maseng-maseng ngisu' arti lain-lain separuh, samo endo besetuju' kini. Jadi kamus yo mu'on Suslak masa itu kan ngisu' keduwo-duwo versi'.

Kelas basa' Ayapaneco ado od dalom rancangan sebagai usaha' teraher kan pemulun semula' basa' ina, tapi minat kod urang ramai endo berapa' samo ido beranti' sabi' walaupun Mr Segovia ado tiru' meli pinsil ngan buku' isu' kelas ina'.

Napon kod Daily Mail Online. Khamis, 14 April 2011.

Read more: http://www.dailymail.co.uk/news/article-1376757/Ayapaneco-Last-2-fluent-dying-language-speaking-other.html#ixzz1Jc4ujcqK