Protes Ngelarat ge Meser

CAIRO, MESER. Jumaat.


Beribu rakyat Meser mupus ge alun-alun ge seluruh Meser alu itu dalom bantahan terhadap pemerintahan 30 ta'un Presiden Hosni Mubarak.

Pembantah tiru' nginju' amaran itu kan jadi alu bantahan yo paleng raya' betemu atin ngan urang ramai yo mupus pali' sembayang Jumaat.

Tapi Menteri' Dalom Negeri' Meser munyi ido kan ngala' "langkah-langkah tuwo'" terhadap ketabi' bantahan anti-kerajaan samo ido tiru perupus tentera khas ido.

Amaran kerajaan na' numu' pali' kajadian begagut ngan pulis sabi' limo betulu nati dalom masa telu alu tiru' bantahan itu ngelarat ge seluruh negeri'.

Perkhidmatan Facebook, Twitter samo Blackberry Messenger tiru' teranti', yo ngumu' pembantah ingau kalau perkhidmatan talipun mobile samo internet iyo od kan penutung.

US samo Britain tiru' munyi ge Meser untuk ngumu' reformasi politik untuk nyelasaikan anyam endo puas ati' urang ramai.

Setiausaha' Negeri' US Hillary Clinton samo Setiausaha' Luar Negeri Britain William Hague tiru' nganggau ge Presiden Meser untuk ngumu' perubahan sementara' negeri' ina' kan ni'an macamana' jadini alu Jumaat itu.



Napon kod Sky News Online, Jumaat, 28 Januari 2011.

http://news.sky.com/skynews/