Basa' Tutong Keno Pamer

TUNGKU, RABU.

Pusat Bahasa Universiti Brunei Darussalam (Language Centre, LC, UBD) alu itu mbuka' acara' minggu' Basa' & Budaya' untuk ketabi' basa' yo najar ge UBD, temuwok dai Basa' Melayu', Dusun samo Tutong.

Acara' yo ninju' ngadan "SPEAKtacular Week" nipun ketabi' basa'-basa' yo najar na' samo nilu serba-segetip kebudayaan yo besangkutan ngan basa'-basa' ina'.

Dalom hubungan itu penuntut Bahasa Tutong (Level II) ngumu' persembahan belagu duo buah lagu terkenal masa itu "Bahasa cinta" (Basa' cinta' - Samsons) samo "Ya sudahlah" (Bah menga' dai - Bondan Prakoso) yo tenukar dalom basa' Tutong.

Tujuan penuntut ngumu' persembahan itu adolah untuk nilu ge urang ramai Basa' Tutong ina' mala' isu' dalom macam-macam cara', temuwok dai isu' belagu lagu popular masa itu. Jalo' atin tujuan iyo dai kan nilu ge urang ramai terutama' generasi muda' Nabai, Basa' Tutong ina' endado kurangni ngan basa'-basa' dunia' lain macam basa' Perancis, Sepanyol atau Korea kod segi kegunaan komunikasi'.

Persembahan penuntut kala' sambutan hangat kod ido yo sabi' ni'an ge Dewan Canselor UBD.
Acara SPEAKtacular Week ina' belangsung kebuai telu alu kod alu itu sabi Jumaat, 28 Januari 2011 ngan bebagai persembahan, pameran, workshop tarian, masak dan lain-lain. Urang ramai keno alu'-alu'kan sabi'.


TUTONGKITA'