Petraeus: Maro Quraan Kan Membahayakan Nyawa' Tentera' US

Pembantah maro patung Terry Jones

Komander US ge Afghanistan nginju' amaran nyawa' tentera' ido kan dalom bahaya' kalau sebuwa gereja' ge Amerika kakal od kan maro kitab Al-Quraan.

Gen David Petraeus munyi tindakan ina mala' nimbulkan masalah "ke'kah ge Kabul gala', tapi dembo gala' ge dunia."

Pastor Terry Jones, kod Dove World Outreach Center, becadangkan maro kitab Quraan dalom apui sempena memperingati serangan 9/11.

Bantahan tiru' numu' ge Afghanistan samo Indonesia.

Kedutaan US ge Kabul nginju' kenyataan ngutuk rancangan gereja ge Gainesville, Florida na'.

"Itu mala' mbahaya'kan tentera samo mbahaya'kan usaha' secara' meluas," Jen Petraeus munyi dalom kenyataan ni ge media US. "Tindakan macamitu dai yo kan nisu' Taliban samo mala' ngumu' masalah.

"Ke'kah ge situ gala', tapi ge dembo gala' ge dunia itu, kita' kan bekerjo samo masyarakat Islam," nini Jen Petraeus, yo ngetuai' 150,000 betulu tentera' Nato ngelawan Taliban.


Lt Gen William Caldwell, Komander latihan Nato ge Afghanistan, mbada' CNN: "Itu kitab suci' ido, jadi kalau ado urang munyi kan ngancurkan barang yo suci untuk ido, ina' tiru' njadi basa' samo keingau ge ido."

Alu Isnin taman itu 500 pembantah betipun ge Kabul sambil berubau "Mulun Islam" sambil maro patung Jones.

Kontroversi itu betemu ati dengan debat ge US pasal cadangan kan ngumu' masjid samo Pusat Kebudayaan Islam endo jawu' kod Ground Zero, antar serangan 9/11 ge New York.

Dalom kenyataan ni ge Wall Street Journal, Jones nerimo amaran Jen Petraeus tapi nemban: "Kita' mesti nginju' mesej jelas ge elemen radikal Islam. Kita' endo atin kan keno kuasai' dengan anyam ba'ut samo gertakan."

Protes yo keno cadang gama' Jones yo munyi Islam "ganas samo oppresive" tiru ngelarat ge antar lain od.

Napon kod BBC News Online, Selasa, 7 September 2010, 9.01pm
http://www.bbc.co.uk/news/world-south-asia-11209738