Banjer Lema' Raya'

Foto: Rose Sabtu


Lema' Raya' (Khamis, 9 Sept 2010)


Dalom suasana' urang ramai arap-arap kan bealu-raya' tiru, ujan nyempot ni dai ge kebanyakan kawasan daerah Tutong endo ranti-ranti kod pukul empat seripot. Keliom alu na' ngumu' urang ramai endo yakin kan gitan anak bulan yo tenerupung seripot ina' od. Tapi endo kesangka' kegitan dai tindah anak bulan Syawal na' mayi pengumuman rasmi' ge radio ngan talibisin. Tapi ujan kakal od endo beranti', mikin nyempot tindah sabi terjadi ni banjer ge kawasan Keri'om, Suran, ge kawasan utama' kadai Tutong, samo ge kawasan pedalaman Kg Penapar. Masjid Hassanal Bolkiah Tutong pun tekeno banjer mabi' tenggelam karpet dalom Masjid na'. Menurut lapuran, Masjid na' endo mala' nisu' kan Sembahyang Sunat Alu Raya' sambut Jumaat ina', iyo od Sembahyang Fardu Jumaat tada'alu ina'. Jamaah ketabi tepaksa bebagi-bagi ge masjid-masjid lain sejani macam li Masjid Keri'om, Penanjong samo Sengkarai.

Lapuran kejadian tana' runtuh samo pu'un tumbang pun ado lema' ina'. Yo paleng menyedihkan kejadian tana' runtuh ge Kubur Sugan, Tutong. Kubur-kubur yo jani ge kireng lod Sugan na' ado kudo buwa tesesor li lempu' segetip.

Setakat itu pihak Kerajaan tiru mbuka' Pusat Gerakan Malapetaka' ge Tutong dalom usaha' kan ngenangani' keadaan.


TUTONGKITA