Tiger Woods Becarai, Pali' Awo 'Melalui Neraka'

Tiger Wood kuan pali' awo munyi iyo endo sayi' nyangka' bano ni kan nipu ge iyo, samo iyo 'melalui neraka' tiru' ni kelulu pasal hubungan sulit ni na'.

Dalom interviu samo People magazine, Elin Nordegren munyi iyo endo sayi' mukul ge iyo, samo iyo ncuba' tiru' pejiya' rumahtangga' ido tapi gagal.

Pasangan na' becarai alu Isnin.

Tiger Woods merupakan pemain golf No. 1 dunia'.

Cerita pasal hubungan sulit Tiger Woods mupus pali' ni ngelanggar metuka' ni ge pu'un kayu ge balui lamin ido November lapas.

Dalom interviu ni samo People, Nordegren munyi: "Endo sayi' ado keganasan dalom atau ge balui lamin jami'."


"Spekulasi pasal jayi' ngisu golf club isu mukul iyo andang endo munasabah."

"Ketabi' tiru' mu'onku untuk perupus iyo kod metuka' bekunci' na'. Kan munyi perkara' lain atin sala' benor dai na'."


Endo buai pali kejadian ina', ado kudo betulu turis ngakun ido ado begila' samo Tiger.

Bulan Februari alu ina', Woods mium ma'ap secara umum samo ngakun iyo curang ge Nordegren, pali' model.

"Mason anyamku' jayi' endo sayi' tesangka' - jalo' pebaek," nini ge interviu ina'. "Kebuai telu-ta'un setengah, masa ketabi' itu berlaku, jayi' adu ge lamin gala' pasal beteri', samo ngan anak-anak, samo sekulahku'.

"Macam muwok neraka' ji'," nini Nordegren. "Payah kan pecaya' ju ado kehidupan itu, pali' ina' terus-terus ni dai... pura-pura kah tu?"

Iyo munyi atin iyo "endado ni'an seminit pebaek golf".

Nordegren endo mbada' kudo sen ala' ni kod becarai itu, tapi media US munyi iyo mungkin kala' lebi kod $100juta'.

Woods ahli sukan tekayo sekali ge dunia', walaupun ni keno gugurkan kudo buwa' penaja', temuwok dai AT&T samo Gatorade, tiru cerita ni begila' mupus.

Pasangan na' kawin Oktober 2004 ge Barbados, samo ado anak turis telu ta'un umur, Sam, samo anak layi 19 bulan, Charlie.

Dalom kenyata'an kod peguam ido alu Isnin, pasangan na' mium endo keno kacau "buat jami' ngebiasa'kan keadaan baru keluarga' jami'."




Napon kod BBC News Online, Rabu, 25 Ogos 2010, 10.34pm
http://www.bbc.co.uk/news/world-us-canada-11088231