Ramadan Hi-Tech

Ramadan, bulan paleng suci dalom kalendar Islam, mulai' alu itu, dengan sukungan teknoloji. FOTO: Bagus Indahono/EPA

Ramadan jadi hi-tech dengan app mobile isu' Muslim puasa' dan sembayang


App Ramadan pesanang Muslim mbaca' Al-Qur'an dan nilu hala' li Makkah untuk sembayang.



Dengan mulai' ni bulan Ramadan alu itu, teknoloji moden mayi nulung bejuta'-juta' Muslim seluruh dunia' ngerjokan ibadah ido.



Application untuk iPhone samo iPad tiru' ado nginju' inspirasi', sukungan samo maklumat praktikal kebuai bulan Ramadan itu.

App Ramadan Daily Dua, untuk iPhone samo iPad, nginju' pengguna' doa'-doa' untuk masa-masa khusus bilang alu sepanjang Ramadan.


Sementara' ina' app Ramadan Booster Pro nginju' nasihat untuk Ramadan.

Nokia ado app Ramadan ni sendiri gala' sanang mbaca Qur'an, ni'an waktu sembayang, samo ngunjar masjid paleng jani'.

Yo paleng endo sangka' untuk negeri' endo Islam, TV Jerman (Channel RTL2) tiru' munyi ido kan mayi nulung penuntun Muslim dengan nilu mesej tanda mato alu' mupus samo curit, samo pukul kudo puasa napu'.


Sebelum itu ado tiru' app lain yo nu'on khas dengan tema Islamik macam iPray samo iQuran, yo nginju' tanda' muwok waktu sembayang, samo app Find Mecca, gala sanang ngunjar Kiblat.



James Otun, pakar teknoloji beumur35-ta'un kod US, munyi iyo ngisu' app ge iPhone samo iPad ni, gala' ni jadi Muslim yo lebi ta'at. Iyo nyaid 'beep' tanda' muwok waktu sembayang masa ni bekerjo nguruskan servis limosin ni. Ado od app yo mbada' iyo dembo ado lakanon Halal. Dengan ketabi' itu nini endo atin ado alasan kan endo ta'at ugama'.


"Kalau ju' kebilu sembayang, mungkin jiyu' endo besala' pasal ju' manusia', samo mala' qada' kenudi. Tapi tiru' ado app itu, mungkin lain dai cara' Allah ngiro," nini Otun.


"Islam ke'kah ngelarang teknoloji. Masa itu kita' mala' ngumu' ketabi dengan lebi sanang, lebi laju'," nini Zinnur Tabakci, yo peli buku ugama' ge Paterson, New Jersey.


Tapi app itu ketabi', sekurang-kurang ni yo endo ninju' percuma' na', mala' jadi keingau dai od, pasal mala' jadi telampau komersil kan ngala' untung ngisu' bulan suci' itu.


Ado od penganut Islam yo pecaya' Ramadan tu tiru' keno sala'guno tiru sebagai jenama' tindah.

Bulan Jun lepas, Kumpulan Pengguna Pulau Pinang ge Malaysia marah ge Menteri' Pelancungan pasal ngumumkan kan nganjurkan acara "Pelancungan Ramadan musim lawu' pertama' dengan pesta' lakanon, shopping, samo aktiviti sukaria' lain" untuk narek pelancung kod Timur Tengah.



Napon kod Haroon Siddique, guardian.co.uk, Rabu, 11 Ogos 2010, 10.36pm.
http://www.guardian.co.uk/world/2010/aug/11/ramadan-apps-iphone-ipad