Ini' 80 Ta'un Kagumkan Hakim

Dalom minggu keempat rancangan "Britain's got talent", hakim-hakim ni temasuk Simon Cowell endo kedaun gama ini' tua beumur 81 ta'un, Janey Cutler.

Persembahan ni yang betenaga masa belagu versi Inggeris "Non, Je Ne Regrette Rien" (No Regrets/ Nado Sesol) Edith Piaf keno munyi "ngumu muka'-bulu dan mengagumkan".

Masa pelepas Cutler yo kod Wishaw, Lanarshire li pusengan seterus ni, Piers Morgan munyi: "Endo ji sayi' kenyaid nuwi-nuwi macam itu."

Lebi 55,000 betulu tiru ni'an video ni belagu ge Youtube, sementara rangkaian TV US CBS samo NBC tiru netong ITV pasal interviu samo Cutler.

Janey Cutler, 81.

Persembahan turis kod Scotland na mbada hakim iyo sayi nginyam susah. Penderitaan ni na tebungkar lepas ni mbada pasal iyo sayi' nati bano duo kali, samo anak setulu, James, masa umur ni taman 10 bulan.

Sumber munyi: "Iyo kakal bebasa asal anak ni na, dan kanang ni kan anak ina gembira samo kuat reseng."

Bano ni mulo-mulo- James od ngadan ni- nati lepas said ruk masa umur ni 67, lepas 34 ta'un kawin. Kawin ni keduo iyo od mabi lepas bano ni, Peter, 76, nati pasal broncho-pneumonia."

Cutler, yo rajin belagu karaoke ge pub tempatan ni, awal ina ba'ut-ba'ut od kan mayi belawan pasal telampau tua tiru.

Kawan jiya ni Terry Moore munyi: 'Masa ji mpuru iyo muwok Britain's Got Talent, Janey endo yakin mulo-mulo. Nini, "Umur kitu tu boh?"

"Tapi iyo ndaftar online samo hakim na rimo dai kan iyo tinda. Daun ni macam Shirley Bassey masa ni muda kulu."

Cutler ado tuju betulu anak samo 12 ayam.

Iyo munyi: "Bandengan samo Susan Boyla na jiya tinda pasal iyo berjaya. Tapi ji ndo peduli pasal ina ketabi. Ji gembira benor ji mala ngumu persembahan."

Ti'an video ni ge situ.




Napon kod Daily Mail Online, Isnin, 10 Mei 2010, 7.43pm
http://www.dailymail.co.uk/tvshowbiz/article-1275798/Britains-Got-Talent-Susan-Boyles-cousin-Kerry-Anne-stuns-judges.html#ixzz0nWXppPqL